Priprema djeteta ne neugodnosti, kada se roditelji ne slažu

Piše : Helena Rosandić, psihoterapeut-mr kliničke psihologije

Pokušajte da se sjetite poslednjeg osjećanja uznemirenosti? Prizovite u sjećanje situaciju u kojoj ste se tako osjećali. Prepoznajte misli koje su izazvale neprijatnu emociju. Nakon toga pokušajte da se sjetite iste emocije koju ste osjećali kada ste bili sasvim mali. Pokušajte da napravite razliku.

Priprema djeteta ne neugodnosti, kada se roditelji ne slažu

Posljednje što vas molim da uradite je da razmislite o osjećanjima vašeg djeteta, ili nekog drugog vama poznatog djeteta, koje osjeća napetost. Pitajte se kako ono razmišlja i kako mu možete pomoći.

Svjesni smo toga da svaki roditelj za svoje dijete radi svjesno ono što najbolje umije. No, nekada i u najboljoj namjeri ne uradi dobro. Nekada zbog vlastitih slabosti naruši stabilnost razvoja svog djeteta.

U posljednje vrijeme se ne tako rijetko dešava da razgovaram sa djecom čiji roditelji su u procesu razvoda, ili čiji partnerski odnos nije dobar. To su djeca koja pate. Koja nemaju odgovor na mnoga pitanja. Oni razmišljaju da oni nešto ne rade dobro, pa se mama i tata svađaju. Nekad se pitaju da li ih roditelji više vole.

U svoj toj napetosti, i sama bivaju izložena propitivanju odraslih. Pitaju ih članovi bliske porodice, koji se uključuju, najčešće bivajući pristrasni za jednog od roditelja. Pitaju ih komšije, predstavnici Centra za socijalni rad, a u krajnjem slučaju i sudije.

Šta reći djeci, kako ih pripremiti za takve neugodne situacije?

Djeci je važno govoriti istinu, prilagođenu uzrastu na kom se nalazi.
Razgovor o neprijatnim situacijama je uznemiravajući za odrasle ljude isto kao i za djecu. Objasnite vašim mališanima da je normalno da ga priča o nekom događaju rastuži ili rasplače. Da mu niko neće zamjeriti, i neće misliti ništa loše o njemu ako pokaže svoja osjećanja.

Ako vaše dijete zbog razvoda prisustvuje sudskom procesu, kao svjedok, ili razgovara sa predstavnicima Centra za socijalni rad, pripremite ga. Objasnite mu da je ono jako važno, i da je važno da ispriča tim ljudima samo ono što ono zna.

Djeca su često u strahu da će otkriti nečiju tajnu.

Oslobodite dijete pritiska, objašnjavajući mu da su ljudi koji rade u državnim institucijama, čuli mnoge tajne, i da oni pomažu osobama koje se dobro ne slažu da riješe svoj problem.

Djecu oslobađa saznanje da na neka pitanja može da ne zna odgovor i da, i ako ne razumije pitanje, može da traži dodatno pojašnjenje.

Odrasli ljudi su često napeti zbog neprijatnih situacija. Sa djecom je isto. Napeta su u situacijama kada se osjećaju nesigurno i nezaštićeno.

Kako im pomoći da se opuste?

Odrasli mogu reći da oni često koriste razne tehnike da sebi olakšaju napetost. Jedna od njih je duboko udisanje vazduha, i što sporije izdisanje. Manju djecu možemo naučiti igru „Naduvavanje balona“. Objasnite mu da kada je napeto može pokušati da se opusti tako što će staviti ruku na stomak i pratiti kako se njegov stomak podiže kada izdiše vazduh kao balon koji se napumpava, i kako se spušta kada udiše vazduh, kao balon koji se ispumpava. Na taj naćin ćete ga naučiti da se opusti.

Neka djeca kada su napeta jako stisnu određeni dio tijela, usne, zube, šaku stegnu pesnicu, ili drže ukrućen gornji dio tijela. Jedan od savjeta koji im može biti od pomoći je da se savjetuju da taj stisnuti dio tijela, stisnu još jače, pa onda puste, prateći kako se baš taj dio tijela nakon toga opušta. Npr. ako je dijete stisnulo šaku, savjetovati ga da nastavi da je stiska, prvo jednu, pa drugu, kao da cijedi mokar sunđer, i nakon toga neka pusti. Osjeti će olakšanje i smanjenje napetosti.

Razgovarajte sa vašom djecom, vi ste za njih važni. Vaše ponašanje utiče na njih i njihova osjećanja. Kada roditelj pati, pati i dijete.

Helena Rosandić
Helena Rosandić
Psihoterapeut - mr kliničke psihologije

Psihološki centar ABC

+382 68 741-923

Ostale Helenine tekstove možete vidjeti ovdje http://www.zenasamja.me/specijali/helena-rosandic

O NAMA

Portal namijenjen ženama i svima koji žele da saznaju više o ženama. Mi smo tu, ne samo za modernu i savremenu ženu, nego i za one koje se ne osjećaju tako. Tu smo za majke, domaćice, poslovne žene, mlade i one u najboljim godinama. Svakodnevno spremamo za svakoga po nešto. Hvala vam što nas pratite ;)

PRATITE NAS NA

© 2011 zenasamja.me. Sva prava zadržana.